Na zìngara m' ha ditto: "... Damme 'a mano,
te vòglio andivinà chi te vò bbène...
si chi te sta vicino o sta luntano
te pènza e si te dice 'a verità...
Ce sta nu còre gióvane, nu còre...
ca sènza 'e te nun sape cchiù campà..."
"Zingara mia... chélla nun me vò bbène:
liéggeme mèglio e truóve 'a verità!
È na figlióla tanto 'nfama e 'ngrata
Ca pure a tte ha 'ngannato
tale e quale
cómme a mme.
Tène na prèta ìmpiétto e no nu còre...
e sulo pène amare
pe nu vaso
sape dà.
È na fattura
che m'ha saputo fà...
ca me fa tanto
chiàgnere e penà.
Zìngara mia, ha miso 'int' a 'sti vvéne...
na smania, nu veléno
ca m'accide:
fa murì.
Dille...
dille accussì:
nun farlo, nun farlo cchiù suffrì...
làssalo 'mpace o dalle dint'o còre
nu pòco 'e bbène e de sincerità!".