Zehnter Juni lyrics

Plant mich bloß nit bei üch en,

Sick ich üch durchschaut hann,

Weiß ich, dat ich nit om allerfalschste Dampfer benn.

Ich hann met ührer Logik nix ahm Hoot,

Wieso ihr wat wo jedonn hatt un noch vüürhatt,

Weshalv övver Leichen joht.

Denn wat ihr logisch nennt, dat nenn ich pervers,

Ühr janze Wertigkeit och.

Mir brich der Schweiß bei jedem Woot von üch uss

Un wenn ihr still sitt, dann och.

Wat ihr „Moral“ nennt, dat ess für mich Krampf,

Wat ihr „normal“ nennt, dat och,

Ühr Ideale hatt ihr diskret verschlamp wie e’ jebruuch Tempodooch.

Sitt ihr scheuklappenblind, wie’t ahl Schlachtrösser sinn,

Affjestumpf oder bloß – skrupellos?

Plant mich bloß nit bei üch en,

Sick ich üch durchschaut hann,

Weiß ich, dat ich nit om allerfalschste Dampfer benn.

Ich hann met ührer Logik nix ahm Hoot,

Wieso ihr wat wo jedonn hatt un noch vüürhatt,

Weshalv övver Leichen joht.

Ihr Noodelstriefe-Schreibtischtäter, hührt zo,

Ejal, wo ihr üch versteckt:

Die Zoot stirv uss, die marionettengleich ihr

Als Minenhunde vüürscheckt.

Ühr Schachfijure hann et Denke jeliert

Un springen einfach vum Brett,

Bess zom Kadaver weed jetz ni’ mieh pariert,

Probiert doch selvs, wie Dreck schmeck!

Noch ess et nit su wigg, doch sick einijer Zick

Weeden’t Daach für Daach mieh – immer mieh.

Plant uns bloß nit bei üch en,

Sick mir üch durchschaut hann,

Wess mer, dat mer nit om allerfalschste Dampfer sinn.

Mir hann met ühre Lüje nix ahm Hoot,

Met däm, wat ihr ald jeloore, lüje wollt

Un däm, wat ihr jraad lüje doot.