Ayt sevgi, bu axir nima qilganing –
Men yorga desam, sen qayga chorlading?
O‘lanchilar eski o‘lanni qo‘ying,
Bilsangiz eng dardli yor-yorni ayting
Qizning taqdiridan qiziq narsa yo‘q,
Siniq ko‘nglidan-da siniq narsa yo‘q
Mening armonimdan tiniq narsa yo‘q,
Bilsangiz eng dardli yor-yorni ayting
Men sevgi bog‘idan uzilgan gulman,
Zimiston ichida yo‘qolgan nurman
Endi oydek qizmas, baxtsiz kelinman,
Bilsangiz eng dardli yor-yorni ayting
Tindiring surnayning ovozasini,
Berkitishdi baxtim darvozasini
Larzaga keltirib to‘yxonasini
Bilsangiz eng dardli yor-yorni ayting