Yola Zong lyrics

Fade teil thee zo lournagh, co Joane, zo knaggee?

Th' weithest all curcagh, wafur, an cornee.

Lidge w'ouse an a milagh, tis gaay an louthee:

Huck nigher; y'art scuddeen; fartoo zo hachee?

Well, gosp, c'hull be zeid; mot thee fartoo, an fade;

Ha deight ouse var gabble, tell ee zin go t'glade.

Ch'am a stouk, an a donel; wou'll leigh out ee dey.

Th' valler w'speen here, th' lass ee chourch-hey.

Yerstey w'had a baree, gist ing oor hoane,

Aar gentrize ware bibbern, aamzil cou no stoane.

Yith Muzleare had ba hole, t'was mee Tommeen,

At by mizluck was ee-pit t'drive in.

Joud an moud vrem earchee ete was ee Lough.

Zitch vaperreen, an shimmereen, fan ee-daf ee aar scoth!

Zitch blakeen, an blayeen, fan ee ball was ee-drowe!

Chote well aar aim was t'yie ouz n'eer a blowe.

Mot w'all aar boust, hi soon was ee-teight

At aar errone was var ameing 'ar 'ngish ee-height.

Zitch vezzeen, tarvizzeen, 'tell than w'ne'er zey.

Nore zichel ne'er well, nowe, nore ne'er mey.