يامه مويل الهوى
يامه موايليا
طعن الخناجر ولا
حكم الخسيس فيا
الصبر حلم العواجز
يطرح زهور الأماني
والقهر عدى الحواجز
وأنا اللي واقف مكاني
شايف غيطان البشاير
خايف وكانن إيديا
حتى الحمام اللي طاير
ما رضيش يرفرف عليا
*
سألت شيخ الطريقه
ما رضيش يجاوب سؤالي
ودارى عني الحقيقه
وفاتني حاير في حالي
*
سألت شيخ الأطبا
دوا الجرح إللي بيا
نظر لي نظرة محبة
وقال دوايا بايديا
*
يا مصر وإنتي الحبيبة
وإنتي اغترابي وشقايا
وإنتي الجراح الرهيبه
وإنتي إللي عندك دوايا
علمني حبك عبارة
سهلة وبسيطة وعفية
شرط المحبه الجسارة
شرع القلوب الوفية