يا بَنات بلادنا
يا زاد عنادنا
يا مَد عروقنا
و غِنوة حُصَّادنا
نجوم الليالي
و القمر العالي
رَدُّوا موّالي
لبنات بلادنا
جَفرَات بثُوب الحُرّية
مطرَّز حَنُّون و طُرَّاح
و الكُوفية فلسطينية
شَالِنها عَالكِتف وشاح
إلهِن تِندق التحية
كُل ما رَف الطير جناح
حِنّة ع كفوف الكرامه
و كُحلتها العِزّة عَالعين
ما بتحني لليأس الهامه
مِغوارة بِنت فلسطين
رِبيَت على نخوة و شهامه
و ما يعلا ع جبينا جبين
سَمرة و الهيبات بفيها
يِكسيها ثُوب الإصرار
وعيوني ما شافت زَيها
تِشبه وَردات الجُلنار
يُغمر بَدر السَما ضَيها
و الزَهر إن ضِحكت بيغار