بێ ڕه‌نگ و بۆیه جیهانی غوربه‌ت
پڕه له تاسه و هه‌نسك و حه‌سره‌ت
كه من ڕۆحه‌كه‌م له كوردوستانه
به‌من چی خۆشی ئه‌م وڵاتانه
بێ ناز و بێ كه‌س بێ دۆست و هاوده‌م
بومه‌ته هاوڕێی گیانی گیانی خه‌م
هێنده‌م نۆشیوه تاڵی و جودایی
بومه‌ته پاشای دنیای ته‌نیایی
بێ كۆڕ و ده‌سته و ماڵ و میوانم
به‌بێ هاوخه‌م و بێ دیوه‌خانم
مه‌ڵێن هاوارم به‌سه‌رزاریه
بونم وابه‌سته‌ی كورده‌وارییه
من خۆشی ژیان نه‌یخه‌ڵه‌تاندم
ده‌ستی زۆرداری ده‌ریپه‌ڕاندم
بێ داڵده و چاره‌م نیمه ده‌ره‌تان
له‌وێ كوشتنه و لێره‌ش ڕۆح سوتان