Wie kunde des iemer werden rât [Leich B] lyrics

1.

Wie kunde des iemer werden rât,

der umbe sîne missetât

niht herzelîcher riuwe hât,

sît got enheine sünde lât,

Die niht geriuwent zaller stunt

hin abe unz ûf des herzen grunt?

dem wîsen ist daz allez kunt,

daz niemer sêle wirt gesunt,

diu mit der sünde swert ist wunt,

sin habe von grunde heiles funt.

2.

Nu ist uns riuwe tiure:

si sende uns got ze stiure

Bî sînem minnefiure!

sîn geist, der vil gehiure

3.

Der kann wol herten herzen geben

wâre riuwe und reinez leben,

swâ er die riuwe gerne weiz.

Dem machet er die riuwe heiz.

ein wildez herze er alsô zamt,

daz ez sich aller sünden schamt.