اعذرينى لو اتصلت فى وقت يمكن مش مناسب
اوعى تفتكرينى يعنى ناوي أعاتب ولا أحاسب
الحقيقة إنى بنهي حكاية بايخة وأفُضها
كنت بتنازل كتير ويارتنى بعد ده كله عاجب
هشترى نفسى وأبيع اللي مكانش فى يوم نصيبي
اللي كان عامل حبيبي وهو أصلًا مش حبيبي
مش هتفرق عندي يعني تقولي عنّي أو تعيبي
كنت قايد من صوابعي العشرة شمع وكنت خايب
كنتى بالنسبالي عندي أغلى من كل الحبايب
واللي كان طول عمره حاضر م النهاردة يبقى غايب
كنت هبعتلك رسالة يعني أسهل من مكالمة
بس قلت أكلمك وأقولك إنّك واحدة ظالمة
كنتى قاسية وكان مزاجك تظلمي وتيجي عليّا
بس شاطرة قصاد صحابنا تعملي نفسك مسالمة