Vrouwe vernemt dur got von mir diz mære lyrics

Vrouwe vernemt dur got von mir diz mære

ich bin ein bote und sol iu sagen

ir sült wenden einem ritter swære

der si lange hât getragen

daz sol ich iu künden sô

ob ir in welt fröiden rîchen

sicherlîchen

des wirt manic herze frô.

Vrouwe enlât iuch des sô niht verdriezen

ir engebt im hôhen muot

des mugt ir und alle wol geniezen

den ouch fröide sanfte tuot

dâ von wirt sîn sin bereit

ob ir in ze fröiden bringet

daz er singet

iuwer êre und werdekeit.

Vrouwe sendet im ein hôhgemüete

sît an iu sîn fröide stât

er mac wol geniezen iuwer güete

sît diu tugent und êre hât

vrouwe gebt im hôhen muot

welt ir, sîn trûren ist verkêret

daz in lêret

daz er daz beste gerne tuot.

Ja möhte ich michs an in niht wol gelâzen

daz er wol behüete sich

krumbe wege die gênt bî allen strâzen

dâ vor got behüete mich

ich wil nâch dem rehten varn

ze leide im der mich anders lêre

swar ich kêre

dâ müeze mich doch got bewarn.