Vrô welt ir sult dem wirte sagen lyrics

Vrô welt ir sult dem wirte sagen

daz ich im gar vergolten habe

mîn grôziu gülte ist abe geslagen

daz er mich von dem brieve schabe

swer ime iht sol der mac wol sorgen

ê ich im lange schuldic wære ich wolt ê

zeinem juden borgen

er swîget unz an einen tac

sô wil er danne ein wette hân

sô jener niht vergelten mac.

'Walther dû zürnest âne nôt

dû solt bî mir belîben hie

gedenke was ich dir erbôt

waz ich dir dînes willen lie

als dicke dû mich sêre bæte

mir was vil inneclîche leit daz dû daz ie

sô selten tæte

bedenke dich dîn leben ist guot

sô dû mir rehte widersagest

sô wirst dû niemer wol gemuot.'

Vrô welt ich hân ze vil gesogen

ich wil entwonen des ist zît

dîn zart hât mich vil nâch betrogen

wand er vil süezer fröiden gît

do ich dich gesach reht under ougen

dô was dîn schoene an ze schouwen

wunderlich al sunder lougen

doch was der schanden alse vil

dô ich dîn hinden wart gewar

daz ich dich iemer schelten wil.

'Sît ich dich niht erwenden mac

sô tuo doch ein dinc des ich ger

gedenke an manegan liehten tac

und sich doch underwîlent her

niuwan sô dich der zît betrâge'

daz tæt ich wunderlîchen gerne wan deich

fürhte dîne lâge

vor der sich nieman kan bewarn

got gebe iu frouwe guote naht

ich wil ze herberge varn.