‘Nfunno a lu mare na pèrla nascètte,
‘ncòpp’a nu mónte nascétte na ròsa,
dint’a nu suónno na vócca azzeccósa
purzì nascétte, pe dirme: "Bonnì"!
Sta pèrla janca, sta ròsa, stu suónno
dint’a stu còre fanno na casa..
la ròsa addóra, la vócca me vasa
dint’a sti ttrézze la pèrla vo’ stà !
Ma a la curóna de nu ‘mperatóre
aiemmé, la pèrla murètte azzeccata,
la rósa róssa me s’è spampanata
e tu, tu pure, nun piénze cchiù a mme !