Vide, qui nosti litteras [23] lyrics

1.

Vide, qui nosti litteras

et bene doces vivere,

quid sit doctrina littere,

de quo et ad quid referas.

diligenter considera,

si sis doctor, quid doceas,

et quod doces, hoc teneas,

ne tua perdant opera

eterna Christi munera.

2.

Vide, qui colis studium

pro Dei ministerio,

ne abutaris studio

suspirans ad dispendium

lucri, nec te participes

coniuge vite vitio;

namque multos invenio,

qui sunt huius participes,

ecclesiarum principes.

3.

Vide, qui debes sumere

religionis gloriam

summi per Dei gratiam,

ne te possit decipere

nec trudat in interitum

Philisteus improvide

– namque prodent te Dalide –

ut non amittas meritum,

Deus, tuorum militum.