Վարդաղբյուր [Vardaghbyur] lyrics

Իմ Վարդանա վարդ աղբյուր, զովություն ես սրտերի,

Բույրն եմ առնում մինչ հիմա ափիդ մախմուր խոտերի,

Ղողանջում ես ու կանչում վանքի զանգերի նման,

Ու դառնում սուրբ հանգրվան իմ մոլորված հույզերի:

Էլի խնջույք բաց անեմ,

Ափդ գինով թաց անեմ,

Իմ կորցրած սիրուհուս

Ոտնատեղը վարդ ցանեմ:

Ի՛մ Վարդանա վարդ աղբյուր, արծաթ ցոլքեր կցայտես,

Անմահական վարդ ջրով քո ափերը կնախշես,

Հազար ու մի աղբյուրից ջուր եմ առել պապակած,

Պապակ սրտով եմ գալիս, գալիս եմ ինձ զով անես:

Սիրուս ձայնն է քո կանչը,

Ծիծաղն է քո կարկաչը,

Իր լուսնկա պատկերն է

Ծիածանել քո լանջը:

Ի'մ Վարդանա վարդ աղբյուր, ինչքան ակդ զուլալ է,

Կանաչ ժայռից վար կիջնես, շրջապատդ զուլալ է,

Կուզենամ սերն աշխարհի քո պես զուլալ միշտ մնա,

Հայ գուսանիս սուրբ սերը, ինչպես ակդ, զուլալ է:

Սեր գաղտնիք են ափերդ,

Գոհար ակն են ցոլքերդ,

Սրտիս սիրավ կարկաչիր,

Զմրուխտ կապած լանջերդ: