Donosu rusignolu,
non cantes suta sa ventana mia
làssami istare solu
unu momentu ca benit s'istria;
custu est logu 'e dolu,
de iscunfortu e de malinconia,
custu est logu 'e pena,
indignu 'e s'amorosa cantilena.
Passadas sun sas dies
chi mi ponias su coro in regiru,
tue cantas e ries
e tenes pro risposta unu suspiru.
Bentos frittos e nies
m'an leadu de vida su respiru.
Su cànticu suave
suspende unu momentu, s’ora est grave.