Nun me ne scòrdo. ’Ntiémpo ’e primmavèra
’a primma vòta nce simmo guardate.
Tu m’aspettave affacciata ogne sera...
Che belli tiempe ca avimmo passate!
A ppòco a ppòco, córnme squaglia ’a céra,
chilli belli mumènte so' squagliate!
Sta vita me s' è fatta néra néra.
Ll'óre d’ ammóre se ne so’ vulate!
Guàrdame ’nfaccia ! Sóngo addeventato
n’ata còsa, n’at’òmmo, ànema mia!
Sto’ ascènno pazzo, nun me fido cchiù !
Nce pare tanto, ca stóngo malato?
Chi m’ ha fatta venì sta malatia ?
Pàssate ’a mana p’a cusciénzia: Tu !!