Tristézza 'e viérno. lyrics

Guarda: sti ffrónne càdono

ngiallute, attuórno a nnuje...

S'e ppòrta 'o viénto... Pàreno

ll' ammóre 'e tutt' e dduje...

Strìsciano, vanno, pàssano...

So' pàlpete e suspire...

Sóngo penziére nire

perdute appriésso a tte...

Guarda che ciélo fàuzo,

e che tristézza 'e séra!

Pare ca ce cummògliano

cu na cupèrta néra...

Pare ca ce strascìnano

dint' a nu fuósso, cupo

cómm'a na vócca 'e lupo

Ca scampo nun ce da’...

‘Mmiézo 'a stu nniro 'e st'àrbere,

p'o scuro 'e chisti site,

chi simmo? Addò s'avviano

sti cuórpe nuóste, aunite?

Sti vvócche nòste pàrlano?

Se strégneno, sti mmane?

E turnarrà, dimane,

stu còre tujo, cu mme?

Nun è na còsa fauza

cómm ’a stu ciélo ‘e séra?

Nun simmo doi fantàseme

sótto a na cappa néra?

Mmiezo a stu lutto ’e ll’anema,

cu ’a frèva dint‘e vvéne,

nui ce vulimmo bène?

O fósse nu chi sa?!

Trèmmo... Me sènto scénnere

nu friddo dint'all'ossa...

p'a strata sulitaria

véco na macchia ròssa...

Po véco ca me lassano

duj' uócchie e ddoi manélle...

Sènto nu frullo 'e scélle...

Te véco scumparì...

Scétame! Viéne! Pàrlame!

Dimme ca sta serata,

cu sti turmiénte ’e strazzio

è fantasia malata!

Dint’ a stu còre sòname

l’ accòrdo ’e na canzóne,

chélla d’a passióne

d’a vita mia pe tte!

Scétame! E famme sèntere

ca stai dint 'a sti vvéne!

Scétame! E famme crédere

ca me vuo' sèmpe bène!

Nun te stancà! Accumpàgname,

pòrtame a mane a mane,

pecchè si t' alluntane,

che sarrà mai de me?