Passàst in bixinau andend’a fai sa spesa
No ti dd’apu mai nau ma fiast una bellesa
Cantu mi fait prexeri ca megas a ddu nai!
E chini dd’iat a crei chi s’estus a cojai?
Candu t’apu connotu, a sa primu castiada
Mi seu súbitu cotu e t’apu domandada
Mi seu fata coràgiu ca fia bregungiosa
E po su mes’e màgiu mi seu cuncédia a isposa
Po cantu fiast bella s’amori ge fut forti
Po mei fiast sa stella chi illuminat sa notti
Ma dopu su prim’annu est cumentzau su ballu
As fattu sballu mannu a lassai su traballu
No apu potziu nudda ca m’inci ant bogau
E a pani e cibudda po bivi s’est tocau
Però su sacrifíciu nosu dd’eus fattu
Ca ti praxia s’uffíciu e no ti praxia su sartu
Su sartu fait is callus e imbecit prima 'e s'ora
A tui praxint is ballus, po cussu andaus ancora
Custas funti iscusas de grandu imbrollioni
Sa schina no dda incrubas poita ses mandroni
Tui puru boluntadi mi parit ca 'ndi lassas
Sa scusa est chi est s’edadi e dónnia di t’ingrassas
No siast offensivu ca t’apu nau mandroni
A tui deu no t’ischivu mancai siast imbriagoni
Mama ddu naràt: est bella cantu est maca
Ma chini imaginàt ca dd’acabàst a traca?
Chi ses maleducau fortzis no tenis nexi
Est ca ses allevau in duas carras de fexi
Circa de dd’acabai ca 'nci depu bessiri
Ca oi depit giogai su Casteddu e dd’ollu biri
Ni mancu a fin’e scira mi 'olis acuntentai
Baidindi a sa partida ca deu m’apu a arrangiai