Torna a Surriento

Vide 'o mare quant'è bello! 

spira tanta sentimento... 

Comme tu, a chi tiene mente, 

ca, scetato, 'o faje sunná! 

Guarda guá' chistu ciardino, 

siente sié' sti sciure 'arancio... 

nu prufumo accussí fino, 

dint''o core se ne va... 

E tu dice: "Io parto, addio!" 

T'alluntane da stu core... 

Da la terra de ll'ammore, 

tiene 'o core 'e nun turná?! 

Ma nun mme lassá, 

nun darme stu turmiento... 

Torna a Surriento: 

famme campá!... 

Vide 'o mare de Surriento 

che tesore tene 'nfunno: 

Chi ha girato tutt''o munno, 

nun ll'ha visto comm'a ccá! 

Guarda, attuorno, sti Ssirene 

ca te guardano 'ncantate 

e te vònno tantu bene: 

Te vulessero vasá!... 

E tu dice: "Io parto, addio!" 

T'alluntane da stu core... 

Da sta terra de ll'ammore, 

tiene 'o core 'e nun turná?! 

Ma nun mme lassá, 

nun darme stu turmiento... 

Torna a Surriento: 

famme campá!...