Una notte de bentu
tres toccos de morte
in sa janna m'an dau,
custu triste mamentu
de male goi forte
su coro at prenau.
A babbu meu, a babbu meu,
a babbu meu mutiu l'at Deus.
Oh it'est sa sorte chi m'at toccau
ca babbu meu sich'est andau.
Coro frittu che nibe
in sa tumba pro domo
chi tue non cherias,
prend'amada che a tibe
sos frores de como
non sanan ferìas.
Chen'abbisare bolau est in chelu
torraemichelu sentza su belu.
Sa morte tzertu no l'as mutia
ca fit sa bida chi ti serbiat.
Umbras mudas colande
caminos de ammentos
penande barjonan,
no an dolu furande
sos menzus intentos
chi a nudda los torran.
Animas bonas como est chin bois
cherìelu bene comente a nois.
Mort'est inoche, sa ruche bocan
lassande lutu, sos toccos sonan.
A babbu meu, a babbu meu,
a babbu meu mutiu l'at Deus.
Oh it'est sa sorte chi m'at toccau
ca babbu meu sich'est andau.