Terra brusiada lyrics

Abellu abellu, terra 'e Sardigna,

sos buscos tuos sun andande male,

ses rica de bellesa naturale

ma tenes fizos de idea maligna.

B'at zente sarda chi est pacu digna

de istare in sa terra natale.

Sardos, a 'che bocamus sa gramigna

de sa piromania istantziale?

Olivarjos, collinas e pianuras,

sos chi los brusian non sun veros sardos,

deven esser currudos e bastardos,

distrughen binzas, ortos e cresuras.

Dae su Gennargentu a su Limbara,

in su Monte Orthobene e in su 'e Gonare,

dae Monte Rasu finas a su mare,

in su monte 'e Lúvula e in sa Giara,

in Supramonte 'e Orgòsolo e in Tonara

sun sas vedettas a binocolare

e cando fumu biden ispuntare

daen s’avvisu a sa Forestale.

Chin pacos mezzos tardan a suprire,

pacos mezzos e pacu personale,

e cando issos lu benin a ischire

est brusiada campagna e litorale.

Pro curpa de balordos ignorantes

calincunu ti nât “terra brusiada”,

pro pacos bertulajos abitantes

brusian pàsculos, tancas e annadas,

gai sos disonestos commerciantes

venden caros mangimes e biada.

Guvernantes de cada colore,

prite a sos sardos los tratades male?

Sa Sardigna est terra de onore,

no est mancu sa burda 'e s'Istivale.