Tammurriata palazzola. [Italian translation]

E mme faje stu pizzo a riso,

e mme faje stu pizzo a riso,

bèllo 'e faccia,

brutto 'e còre,

ca te piénze 'e rrepassà.

Ma 'o cafone d' 'a campagna,

se 'mbriaca 'int' 'a vennégna.

'Sta resata nun arrègna,

io te saccio anduvinà.

Va', vatté',

va', vatté',

sparàgnate 'a sagliuta,

sparàgnate 'a sagliuta,

ca si' carta canusciuta (1),

fatte 'o cunto â fòr' 'e me.

Passe e spasse e nun te truóve,

passe e spasse e nun te truóve…

che mme 'mpòrta?

Tiéne 'e chiuóve?

Justo a me mme vuó' 'nchiuvà?

Ma só' zéngara strafina,

sóngo 'a sòra d' 'a 'mbriana (2),

'nfacci'ô nniro d' 'a tiana (3)

io te pòzzo janchià.

Va', vatté',

va', vatté',

sparàgnate 'a sagliuta,

sparàgnate 'a sagliuta,

ca si' carta canusciuta,

fatte 'o cunto â for' 'e me.

E mme faje chist'uócchie 'e tréglia,

e mme faje chist'uócchie 'e tréglia.

Nun vaje niénte,

miétt' 'a mèglia,

tèngo ll'asso e tèngo 'o rre.

Cacciatore? E po' vedimmo

si t' 'abbusche 'sta medaglia.

Si si' buóno a sparà 'a quaglia

o si 'a quaglia spara a te.

Va', vatté',

va', vatté',

sparàgnate 'a sagliuta,

sparàgnate 'a sagliuta,

ca si' carta canusciuta,

fatte 'o cunto â fòr' 'e me.