Taddart n leqbayel lyrics

D afzim ɣef twenza n wedrar

Trennu-yas di leɛnaya

Tessaweḍ alammi i as-d-tezzi s umrar

Terfed-it am yirin n tuga

Tezger-d leqrun adfel d uɣurar

Teṭṭef zdat waṭṭan d lgirra

Xas akked d laẓ tennum tetturar

Taddart n Leqbayel yiwen ur tt-yecba

Tebna ɣef lsas n tlelli

Yal taddart weḥd-s d tagduda

Akka i tt-id-nufa iḍelli

I aɣ-tt-id-ǧǧan imezwura

Tezḍa tagmat tzeṭṭ tadukli

Gar warraw-is leqder d lḥerma

Nettat i ten-yesɛan ur tɣelli

S tejmeɛt i ferrun tilufa

S tejmeɛt i ferrun tilufa

I tessen kan d iman-is

Am ufaṛez di tmellalt

Ddunnit i deg i d-teṭṭef tmuɣli-s

S wallen-is i d-tḥud tilisa

Ma tettqadar lǧar-is

Di ssuq kan i t-id-suma

S twelliyin i tezḍa

Lehna gar tudrin d leɛrac

Tsel akka tikwal s tmura

Andi i d-zgant yiwen ur yezṛi

Tin i ɣef i d-ḥekkun akked Franṣa

Waqila d tamurt n uṛumi

Aṛumi seg wass mi i d aɣ-yeṛza

S tarwa-nneɣ i iqubel Lalman

Ar Landucin seg-neɣ i iɛebba

Ddunit ɛni tewweḍ kul amkan

Tewweḍ ɛni ddunit ar yal amkan

Deg yidammen n tarwa-s tessenɣal

Ɣef Lezzayer alammi i tt-id-nḥella

Tenwa ar tlelli-s ad tuqqel

Ar wakal akked d lḥerma

Ziɣ d imeṭṭawen i tt-yerǧan d cɣel

Ɣef win yemmuten igzem-as tasa

D win twala ar temdint yuzzel

Deg yiwen wass teǧǧel tennebra

Deg yiwen wass teǧǧel tennebra

Seg wass-nni tebda asirem

Ad tuɣal am zik-nni

S igujilen-is i d-teɣrem

At cwahed at lḥenni

Tettweṣṣi-aɣ ad nefhem

Fṛansa d Lezzayer-agi

S tudrin yiwet i tt-tweccem

Si Fṛansa nḥewwes-d tamusni

Lezzayer ass-a s lḥukuma-s

D taɛrabt kan i aɣ-id-tewwi ar taddart

Ma teṛza azgen di lḥerma-s

Tennerna ddeqs di tezmert

Di lweqt i deg yal tamurt ad d-tas

D adrum di ddunnit yeqqlen d taddart

S ixxamen-nneɣ kecmen-d akk leǧnas

S tmaziɣt neṭṭef-asen-d tasawent

S tmaziɣt i d-neṭṭef tasawent