Su Palu de Onieri lyrics

Una chida prima cumintzat

sa bidda a si pònnere in motu:

la bestin a festa chin proprios colores

isseperaos dae tempus notu.

‘Untana in biancu e ruju

de s’abba issu juchet sa vena.

Sant’Anna - Su Nodu in giallu e celeste

pro sa Mama de grassias prena.

Aranzu e blu Sant’Antoni

a monte picat su caminu.

Su prus anticu chi est Monte Ormina

de oro e de prata bestidu.

[Torrada:]

Ajò a sa bidda de Onieri a bider su palu galanu.

Currimus chin deche poleddos, un pro vichinau.

Nos ispinghet sa passione ca non b’at bann’in dinare,

passione de su sardu fieru, traditzione de poderare.

Sos Èremos, betza fratzione

chin bestes biancas e blu.

Santu Juvanne tintu a viola e a rosa,

sa crésia antica non b’est prus.

Sa ‘e Lovicu chin Santu Bustianu

est giallu e nigheddu pintau.

Su Camin’e Orane chi usaban sos betzos

de biancu e birde est colorau.

Passizat sa zente in Bia ‘e Susu,

nigheddu ma ruja s’istella.

Cudda Preda Manna de oro e granada

s’imponet granìtica e bella.

[Torrada]

Como sa die est arribada,

su carru e sos boes sun bardaos,

presentan cussa bandela

chi andat a su primu de sos vichinaos.

Sedin a sa nuda sos fantinos,

chimbe pro duas baterias;

si pòmpian in cara chin isfida

pro aer sa finale garantia.

Goi ses a filu in sa fune

e a rincursa a unu molente.

Che i’su bentu si fachen tres ziros,

inziriaos dae totu sa zente.

[Torrada]

No irmenticamus sos sótzios,

hómines de ringratziare

ca totu s’annu, a cada cussorja

issos chircan de cuntentare.

Grande passione issos an,

non b’at balanzu perunu.

Sa traditzione depen a manténnere

chentza abbandonare a nessunu.

E duncas a boche prena

cantamus totus impare:

Fortza su Palu! A s’annu chi benit

semper nois amus a torrare.