Suónno 'e fantasia

Ce sta na casarèlla 'mmiéz'ô mare

addó mme sònno sèmpe 'e stà cu tté.

Ce passano, cantanno, 'e marenare

e ll'aria frésca addóra cómm'a cché.

Dint'a sta casarella te vularrìa purtà

Pe t'abbraccià, pe te vasà,

pe te vasà, pe t'abbraccià.

Ma chistu suónno d'òro,

è suónno 'e fantasia,

ca mme turmènta sèmpe 'a vita mia.

Ce sta na muntagnèlla tutta vèrde,

'o sóle nasce e mòre sèmpe llà.

'Ammore, 'mmiez'ê ffrónne, nce se pèrde,

e i' nce perdésse 'a vita pe tt'amà.

‘Ncòpp’a sta muntagnèlla te vularrìa purtà

pe t'abbraccià, pe te vasà,

pe te vasà, pe t'abbraccià.

Ma chistu suónno d'òro,

è suónno 'e fantasia,

ca mme turmènta sèmpe 'a vita mia.

Ce sta nu còre ca suspira sèmpe

e ca nun tròva pace maje pe tté.

Ce stó' piantanno ròse 'e tutte tiémpe

e sèmpe spine nàsceno pe mmé.

'Ncopp'a stu core mio te vularrìa fà stà,

pe t'abbraccià, pe te vasà,

pe te vasà, pe t'abbraccià.

Ma chistu suónno d'òro,

è suónno 'e fantasia,

ca mme turmènta sèmpe 'a vita mia.