Milia vatu' sa trota
pro sa die 'e s'isposonzu
carculanne su bisonzu
ca non b'ana cosa cotta
su maritu 'e Liotta
su connatu 'e Mugrone
De su cojuviu novu
n'es cuntentu Cadone
Buzzuiu chin Zoseppedda
Vruttuosa chin Cozzette
preparan sos amarettes
pro s'isposu 'e Luiseddu
dae Untana 'e Chiseddu
ghira' chene pantalones
De su cojuviu novu
n'es cuntentu Cadone
Latur d'ava e una pudda
lì regalat Caziollu
pro jocaren'a zirollu
cann'istan chene ache' nudda
dae cue eni' sa brudda
sa bria sa chistione
De su cojuviu novu
n'es cuntentu Cadone
Sintollu e Mojeddu Murru
son 'arrejon'e pare
ite l'amus a donare
a custu cane muzzurru
sa die chi contzat s'urru
li regalo su mattone
De su cojuviu novu
n'es cuntentu Cadone
Vinamenta' Reateddu
cantu cuntentu rimanet
a canno cria' sa cane
lir regalat su cazzeddu
pro tentare a Luiseddu
ca time' su mammuzzone
De su cojuviu novu
n'es cuntentu Cadone
Bainzu chin franzisc'anna
Pauledda 'e Montesu
preparan su pinutesu
ca er donu 'e zente manna
e tanno puru Grass'Anna
lir giuchet su curizzone
De su cojuviu novu
n'es cuntentu Cadone
Pretu 'e Jana er ridenne
chin su murru che porcheddu
nannebil'a Luiseddu
a ti la se intennenne
chi si in cue ti nche penne'
ti toccan che malinzone
De su cojuviu novu
n'es cuntentu Cadone
E binas Anghelu Rusta
lir regala'su puddichinu
tottu custa e' sa vrausta
de sa izza 'e Zesarinu
jà t'a jutu mal'ustinu
gherranne chi' sa curusta
Vittoria li na' sa justa
no' b'a mancu paragone
De su cojuviu novu
n'es cuntentu Cadone
Pretore chin Pezzoreddu
Salvatorina 'e Burua
istan sempres cua cua
pro no ider a Luiseddu
ei sa mama a tocheddu
lir regalo sas ambesuas
ca cussu puru jà aiuat
non giucat s'iframassone
De su cojuviu novu
n'es cuntentu Cadone
Dae orar de ichinatu
bi li supri' Malebonu
ca no' b'at ateru donu
nche lir juchet s'imbiatu
sa die er morta sa gattu
c'a mannicatu sapone
De su cojuviu novu
n'es cuntentu Cadone