Los an falados da’ fogu sos montes de ‘idda mia
A calbone allutu ebbia an reduidu su logu
In s’ierru s’astraore totu cantu at arruinadu
Sa pastura nd’at sicadu, at distrutu su laore
Cun su nòrdicu rigore at batidu annada mala
E arribin dae dogn’ala lamentos de carestia
Los an falados da’ fogu sos montes de ‘idda mia
In istiu est arribada sa desértica sicagna
Mancu s’ària ‘e muntagna podet esser respirada
E i’sa zente est ispantada de ‘ider custu sicore
Cun totu custu calore parimus in Algeria
Los an falados da’ fogu sos montes de ‘idda mia
E puru b’at zente indigna ch’a su male azunghet male
Cun d’un’ira criminale est brujende sa Sardigna
Ratza pérfida e maligna, sa chijina an semenadu
In Barbàgia e in Barigadu, Nurra, Sulcis e Baronia
Los an falados da’ fogu sos montes de ‘idda mia
Impunidos, sos balentes sa natura sun bochende
A desertu reduende sun tancas e padentes
Cussos colvos putzolentes cheren totu avvelenare
Los depimus isolare che canes peri sa bia
Los an falados da’ fogu sos montes de ‘idda mia
Poveritos innotzentes, miserina custa sorte
Oh ite cudrele morte sos cudreles bos an dadu
In piantu an lassadu isposas, mamas e fizos
A pagare sos fastizos de custa tzega mania
Los an falados da’ fogu sos montes de ‘idda mia
Los depian cundennare a brujare lentamente
Subra su calbone aldente finas a si ch’istudare
In manera chi proare potan cussu bellu jogu
In manera chi in su fogu lassen sa piromania
Los an falados da’ fogu sos montes de ‘idda mia
Los an falados da’ fogu sos montes de Sardigna mia