دوو زوڵفی چین بە چین کرد
کە نافەیی خەتایە
دوو مەمکی دامە دەستی
هەناری شلکە سایە
ئۆخەی ئۆخەی شۆڕە ژن
با لەسەر تۆ بمکوژن
دەس هەڵگیری باڵات نیم
لەسەر ڕووی تۆ بمنێژن
بە خەندە چەرخێکی دا
کە شەوق و نەشئە وایە
بە نوکتە پێی نیشاندام
سەما لەسەر هەوایە
پەردەی کراسی لاچوو
پشکوت بە هەردوو لێوان
گوڵ و شەکەر دەباری
لە کوچە باغی سێوان
زوڵفی پرژاند لە کوڵمی
وە دەرکەوت لە نێوان
شەمس و قەمەر هەڵاتن
دوێنێ نوێژی شێوان
ئۆخەی ئۆخەی ناسکە ژن
با لەسەر تۆ بمکوژن
دەس هەڵگری باڵات نیم
لەسەر ڕووی تۆ بمنێژن