Sephardic Folk - Por Que Llorax Blanca Niña?

- Por que llorax blanca niña,

Por que llorax blanca flor?

- Lloro por vos cavallero

Que vos vax y me dexax.

Me dexax niña y muchacha,

Chica y de poca edad.

Tengo niños chiquiticos,

Lloran y demandan pan.

Si demandan al su padre,

Que repusta les vo a dar?

Metió la mano en su pecho,

Cien dovlones le fue a dar.

- Esto para que m'abasta,

Para vino o para pan?

- Si esto no vos abasta,

Ya tenex d'onde tomar.

Venderex viñas y campos,

De la parte de la mar.

Vos asperarex a los siete.

Si no, a los ocho vos cazax.

Tomarex un mancevico.

Que paresca tal y cual.

Que se vista las mis ropas,

Sin sudar y sin manchar.

Esto que sintió su madre,

Maldición le fue a echar:

"Todas las naves del mundo,

Vayan y bolten con pas.

Y la nave del mi hijo,

Vaya y no abolte jamas".

Pasó tiempo y vino tiempo,

Descariño le fue a dar.

Asentada en la ventana,

La que da para la mar.

Vido venir navezica,

Navegando por la mar.

- Asi biva el Capitán

Que me diga la verdad.

Si veriax al mi hijo,

Al mi hijo caronal?

- Ya lo vide al su hijo,

Al su hijo caronal.

Echado en aquellos campos,

La tierra tenia por cama,

Y el cielo por cuvierta.

Tres buracos el tenia

Por el uno le entra el aire.

Por el otro le entra el sol.

Y por el mas chico de ellos,

Le entra y sale el lunar.

Esto que sintió su madre,

A la mar se fue a echar.

- No vos echex la mi madre.

Que yo so tu hijo caronal.

Ye se bezan y se abrasan.

Y se van a pasear.