Sendeschluss lyrics

Samsdaachohvend, „Ohnsorg“ läuf,

Övverm Hof spillt einer Klavier.

Drusse räänt et, Mama schlööf

Zwesche Salzjebäck un Bier.

“Lottozahle“, widder nix,

“Woot zem Sonndaach“, „Tagesschau“.

Papa litt ald lang em Bett,

Noh der „Sportschau“ wohr e’ blau.

„Weil dä FC su niemohls Meister weed...“, säät e’,

Un övverhaup: Hä will sing Rauh.

Samsdaachnaach, fass ohne Ton

Noch ’ne Spätfilm em Projramm,

Irjendjet met ’nem Spion,

Dä durch Muhre luhre kann,

Cadillacs un Crime un Sex,

Vill Klamauk un reichlich Stuss,

Met Showdown un Happy End,

Met ’nem falsche Zungekuss,

Halt su, wie mer’t vun dausend Filme kennt.

Donoh dann endlich Sendeschluss.

Jetz stonn ich he, enn Augsburg vüür der Hall,

Ich lauf he röm sick koot noh drei,

Weil ich halt noh däm Film janz leis

Durch die Tür benn – aus, vorbei.

E’ bessje Muffe hann ich schon,

Wat meinste wohl, wie mer naax friert?

Hätt besser jet mieh enjepack,

Nit nur he dat Breefpapier.

Bess Frankfurt ’ne Container Truck

Un sick Stuttjart schriev ich dir.

Ah ja, Kerstin heiß ich, ich kumm uss Kalk,

Fuffzehn weed ich noch diss Johr.

Du denks bestemmp, ich hätt ’ne Knall,

Klar, wieso tramp ich üch noh?

Ihr saat, ihr hatt kein Jobs mieh frei,

„Längs komplett“, ’sch wööd nit jebroot.

Doch scheiße, Mann, ich wöhr su jähn dobei,

’Sch hatt jedaach, dat ihr verstoht.

Saach, jeht dä Abfuck eij’ntlich nie vorbei?

Dat och noch ihr mich hänge loot!