Bèlla figlióla ch'hê 'ngannato a ttante,
chi sa si 'e tradimènte ll'hê cuntate.
Ma si t'affacce, 'e vvide a ttuttuquante,
simmo 'a quarantaquatto 'nnammurate.
Ammóre è dóce e 'o spassatiémpo è bèllo,
ll'arape 'sta fenèsta o nun ll'arape?
Chist'è 'o mumènto pe chiammà ll'appèllo,
affácciate nu pòco e cónta 'e ccape.
Che finézza 'e cuncertino,
ma è n'orchèsta o na fanfarra?
Pèppe gratta 'o mandulino,
Tóre pìzzeca 'a chitarra.
Giòrgio sòna 'a ciaramèlla,
Papiluccio, 'o putipù.
Picceré', sciuldézza bèlla,
sulo chésto saje fà tu.
Bèlla figlióla ch'hê 'ngannato a ttante,
tenive 'nfrisco tutte sti partite.
Mo 'e vvide ca te sfilano pe 'nnante,
ma 'o tiémpo passa e tu nun te marite.
Nun ce sta còre ca nun hê traduto,
nun ce sta vócca ca nun hê vasato,
ma nun fa niénte, va'. Chi ha avuto ha avuto,
tutto s'accòncia cu na serenata.
Picceré', stu cuncertino
pòrta overo 'e cape suone,
Bebé canta e Vicenzino
métte 'a tèrza da 'o puntóne.
Giòrgio sòna 'a ciaramèlla.
Papiluccio, 'o putipù.
Picceré', sciuldézza bèlla,
sulo chésto piénze tu.
Bèlla figlióla ca staje 'nchiusa 'a dinto,
vuléssemo sapé cu chi staje 'nchiusa.
Fall'affaccià, ll'avimm'a fà cunvinto
ca tu nu juórne 'o 'nchiante cu na scusa.
Tu si' na scellerata e 'o tradimènto
crésce cu 'e vase ca ve date ô scuro.
Dille ca se 'mparasse nu strumènto,
ll'ha da sunà cu nuje ll'anno venturo.
Picceré', pe tutt'o vico,
vanno 'e nnòte 'e 'sta canzóne,
si vedisse 'on Federico
ll'urganetto còmm' 'o sòna.
Giòrgio sòna 'a ciaramèlla.
Papiluccio, 'o putipù.
Picceré', sciuldézza bèlla,
sulo chésto saje fà tu.