Mo 'mbarcóne; mo 'nnanz'o spècchio;
mò sdraiata 'ncòpp'o divano...
Ma na vòta... ched'è na vòta?...
Te truvasse cu ll'aco 'mmano!
Nun se scòse maje niénte?... Niénte?!
dint' 'a 'sta casa toia? Che saccio!
Te vedésse dà maje nu punto;
te vedésse fà nu rinaccio?!...
Nun se spèzza mai na fettuccia?...
Nun se ne vène nu bettóne?!
Te l'hê fatta 'na canestèlla
cu ll'ache, 'a fòrbice, 'o ccuttóne?...
Vène 'o Sàbbato 'a lavannara;
pòrta 'e panne... Ma ci scommétto
ca tu, lèpeta e rincresciósa,
nun te stire nu fazzulètto...
E sì bèlla! Sì accussì bèlla,
c'uno... t'ha da guardà pe ‘ncanto...
E i' te guardo... Ma pe tramènte
do 'n'uócchio â càmmara ogne tanto.
Guardo... E vvéco... Ciérre 'e capille
sparpagliate 'ncòpp'a tulètta...
'O piumino, ca t'è sservuto,
'ncòpp' 'o marmo d'a culunnètta...
'Na cazètta 'ncòpp'a na sèggia...
e ll'ata sta... vatròva addò...
Nu cappiéllo sótt'o lettino;
nu scarpino 'ncòpp' 'o cummò...
Ma sì bèlla! Sia 'ntulettata,
sia cu nu càmmese 'e macramma...
E i' te vòglio!... Ma... Cómme faccio,
si 'a muglièra addieviénte mamma?