Estremecido miro el televizoro.
Destruyéndose está mi Saray de oro.
Nunca pensava que pudía ser verdad
Tanta inhumanidad y terrible crueldad.
Lo que se pasa hazen sus civdadinos,
Ayer amigos y tan buenos vizinos.
La cruela política todo derroca,
Enteremente a la gente troca.
Ángeles divinos, onde vos topax agora
En esta, sincero dicho, mala hora?
Atrás ochenta años en Saray me nací,
De mi chiquez toda la vida allí pasí.
Me recordo del meldar y de Ham Daniel,
El primero alef-bet ambezándolo de él.
En caza uzávamos la lingua española,
Con los amigos la lingua de la escola.
De la España truximos la cultura y tradición,
La lingua y romanças cultivimos con emoción.
Si la Medinat Yisrael no existía,
No sé cómo se salvava la judería.
Embiamos munchas gracias al Dio alto y poderozo
De criar por tresera vez muestro país gloriozo.
Ángeles divinos, onde vos topax agora
En esta, sincero dicho, mala hora?