سامح الله احتياجي كثر مايوجع غلاك
وسمّح الله كل دربٍ ماوصلك بخطوتي
في امان اللي ينسّي حتى والذكرى معاك
في امان الله واسكت قاطعتني غصتي
اخذتني باحساس طيب رحت تاركني هلاك
لاملامح لاجوارح لارفيق بوحدتي
كنت احسك يوم تقفي كنها بصدري خطاك
كل خطوه في اثرها كنت تترك طعنتي
قمت اتذكر جروحك علني اقسى قساك
مادريت اني ابلهى فيك وانسى قسوتي
من يسلفني جناحٍ مارقى عالي سماك
ومن يسلفني كلامٍ ماشرحلك حسرتي
قلت باعلى صوت عندي صاحبي مالله هداك
وقبل ما انطق كلامي سكنتني دمعتي
خفت لايقسى شعوري وكامل احساسي بغاك
وخفت لايضعف شعوري قبل ما اعلن قسوتي
يا فراقك ما قويتك كبريائي اللي قواك
كل ماعزمت ابرجع استضاقت دنيتي
يوم راح القلب عندك عاد لي بس ما حكاك
قال لي مريت جنبه بس توجع كسرتي