مرة غلبني الحلم، وما أكتر الأحلام
صارت خدود السما، صفحة من كتابي
خربشت ع وجه السما، أول حرف بالشام
ولمحت فارس لفي، يدقدق على بوابي
صاير حلو هالشّارع اللي قبالنا
يمكن وِعي تَ ينتبهلو خيالنا
مدري الشّتي، غسّل بميّاتو الطريق
مدري لَمَعْ طيف اللي كانوا بْ بَالنا
قلبي متل شبّاكنا محتار
عم يلمح خيالات مكسورة
ميلةْ برد والحلم فيها صار
يرسم على أرواحنا صورة
وميلة على كتر الدفا منصير
نغفى ونوعى بِ حلم يحلالنا
صاير حلو هالشارع اللي قبالنا
يا غيم يَ الـْ ناطر صدى موّالنا
ملبّك متل عاشق إذا غنَّالنا
مدري منعْشَق وْ عَ حالنَا منعودْ
مدري منهربْ، بالعشق، منْ حالنا
وصاير حلو هالشارع اللي قبالنا