Sa paghe e s'amore [English translation]

Ei si pregat a donz’ora

in su mundu intreu sa paghe e i’s’amore.

Si pregat a donz’ora,

diat sa manu Deus inue gherran ancora.

In su mundu intreu

inue gherran ancora diat sa manu Deus.

Sa paghe e i's’amore,

in cust’umanidade tzesset dogni rancore.

Chi tenzen piedade,

tzesset dogni rancore in cust’umanidade.

Tue pregas e saldus

non s’inde ‘idet prus de sàmbene ispartu.

Ch’in su mundu confusu

de sàmbene ispartu non s’inde ‘idat prus.

Sa vida pius sicura

a s’onestu citadinu li finat sa paura.

In domo e in caminu

li finat sa paura a s’onestu citadinu.

Pro su terrore e lutu

famìlias arreu pianghen a sucultu.

Pro custu gestu feu

pianghen a sucultu famìlias arreu.

Cortiade a bellu,

sa paghe torret sana in custu mundu bellu.

De zente pius umana

ch’in custu mundu bellu sa paghe torret sana.

Pitzinnos chi naschides,

custu sintzeru cantu dae coro intendide.

Calmade su piantu,

dae coro intendide custu sintzeru cantu.

In s’amore unidos

sos chi male an fattu sian penetidos.

Luntanu dae ‘ogni reatu

sian penetidos sos chi male an fattu.

Abbratzen sa vida

piena de amore e de paghe unida.

In sa vida s’onore

e de paghe unida, piena de amore.

In mesu a s’avolotu

pro nois pecadores mortu est su Babbu ‘e totus.

Cun penas e dolores

mortu est su Babbu ‘e totus pro nois pecadores.

Su versu est finidu,

chi torren a gosare sos chi an suffridu.

Su meu augurare,

sos chi an suffridu chi torren a gosare.

Dae su chelu altu prego a su Segnore

chi torren a s’incantu sa paghe e i’s’amore.