Sa Morte ’e s’Ilighe lyrics

Proite m’ind’as bettadu? e no ischias

Chi m’an sos antigos tuos piantadu?

O forsis s’umbra male t’apo dadu,

Cando a s’istadiale t’ind’enias?

Dae una lande, 'attida intro s’iscaltzu

De unu columbu areste innoghe mortu,

Piantadu m’aìan in mes’e ortu.

Curriat tando su mese ’e frealzu.

Ma maju 'enzeit carrigu de ardores,

De varias ervas a sa terra;

E a ponner sas cortes in sa serra

Nde fin torrados totus sos pastores.

E deo puru, pro 'ider cussa festa

De fiores, de montes e piantas,

Ponzei sas fozas mias totu cantas

E a su sole pesei sa testa

Tènnera e bella. No aìa un’annu

Chi pius de un homine fi’altu;

Poi ramos deretos ap’ispaltu

E mi fattei superbu, forte e mannu.

E fentomadu ‘enzei in donzi banda

Pro s’abundantzia e pro ramos nodiu;

Umbras serenas daìa a s’istiu

E in s’ierru giompiat sa lande.

E nd’apo 'idu de nottes e de dies

Malas e bonas; soles e turmentos

De temporadas. Mai a sos bentos

Zedei, ne a carrigos de nies.

Deretu fia, che i’su destinu

Bonu de custa domo e de cust’ortu;

E tue, ingratu, m’as mortu!