Oje est sa die prus bella ca su Segnore nos at muttiu,
paris in sa capella pro su cumpriu ch'amus pediu.
No at ateru disizu sa mama ch’at precau,
sos benes pro su fizu cando in sa mente nos at sinnau.
Si solos nos cherimus in d'un ateru chelu
no est ch’irmenticamus sas prendas bonas, bellas che anghelu,
ma chin amore santu nois semus pro chircare
prenos de cada bantu, àteras vidas de semenare,
ricas de godimentos comente a nois at onorau
sos bonos sentimentos chi mama e babbu nos an dau.
Ite bella sa manu como chi juchet s'aneddu 'e oro.
Deus ch'est soberanu m'at nau a istimare custu tesoro,
intro 'e su coro meu a lu bramare forte
chircàndeli recreu gai in sa bona e in sa mala sorte.
Cando si bortat die m'acollit su cunfortu
d'èssere a curtzu a chie dae custu affettu mai siat issortu.
Tocat s'Ave Maria, sa gloria 'e su Sennore,
no est inoche ebbia ch’amus azudu de su Pastore
ne chin sa domo 'e oro e sos disizos de ‘onzi cosa,
ma pacu e chin decoro, chin sa salude e s'aneddu 'e isposa.