S'era no poia mos chans [poem 5] lyrics

S'era no poia mos chans,

No sai per que mais s'enans,

E si no.n val dos aitans

Que far no solia,

Ben auras drech lo.m soans. -

E per que - no m'o demans!

Qu'eu no t'o diria

E si.m seras drogomans -

A cui - leis cui sui comans. -

E com entendra tos mans -

Ja d'aco no.t sia!

Que.l dichs e.l fachs e.l semblans

E.l noms e.l pretz e.l bobans

T'er guitz en la via.

E tu ja.t fas conoissens -

Eu oc. - e donc non entens

C'us motz fatz fass'aprendens

E ses maestria -

Si fatz be, mas tot es sens -

Per que volh que tota gens

Li port garentia.

Que.l seus bels cors convinens

Es assazatz e manens

De totz bos ensenhamens

E de cortezia -

Ja n'auras tu malvolens,

Car en trop lauzar t'emprens. -

E que.m graziria

S'eu enemics e guerrers

No.m fazia volonters

C'us enoios fols parlers

Trob'om chascu dia

Fors qu'eu no sui sobransers,

Mas si la.m blasmav'Augers,

Eu lo.i combatria.

Que.l seus laus es drechurers

E.l noms vers e.l pretz enters,

E si m'era vis esters,

No.m n'entrametria!

C'anc fort no fui sovenders

D'aitals lauzars plazenters

Ni non o seria.

E tu, que - tanh sos lauzars -

Ja m'en forsa sobramars. -

Mais t'en valria chalars -

Be.n ditz gran folia!

Que, per Deu, sol lo parlars

M'adutz tals cen bos pensars

C'us quecs m'en valria. -

E si tos dichs no te chars,

No t'en volgras esser pars -

Eu no per re! que.l cudars

M'aiud'e m'embria,

So m'es vis, totz mos afars

E valra.n mais mos chantars

Per aital paria

E si.l bos reis dels Navars

M'o lauza, de mans blasmars

Gaire no.t daria.