Rose adduróse... [Italian translation]

Ròse adduróse ’e maggio! Int’e ciardine

nce sta n’addóre d’erva mbalzamata!

Spóntano ‘mprufumate ’e giesummine,

tutt’a campagna 'e sciure è puntiata.

'O sóle ndòra ’o munno attuórno attuórno,

arriva addò le pare d’arrivà,

e cu ’o saluto e cu lu buóno juórno

ll’àneme triste córre a rischiarà.

Ncòpp’a fenèsta mia, na ròsa ’e maggio,

cu nu culóre ’e carna tennerèlla,

se fa cchiù róssa sott’a chisto raggio,

e cchiù s’arape, e cchiù addevènta bèlla.

’O sóle ’a vasa ‘mmócca tuttaquanta,

cómm’a na vòta io te vasavo a tte;

ah, stiennamélla, chésta mana santa,

tòrna a vulérme bène e a penzà a mme!