Ricordo [Italian translation]

Aggio truvato ciérte ffrónne 'e ròse int'a nu libbro 'e méssa...

e me so' allicurdato 'e tanta còse...

Aggio penzato a Essa!...

Quant'era bèlla! E quanto m'ha vuluto bène!

E che bène io lle vulévo! ‘Ncòpp’a sti ffrónne cómme aggio chiagnuto!

Fremmarme io nun putévo.

Essa è mòrta.

Murette 'e nu Natale...

Nascènno 'o Bammeniéllo éssa murètte

d' 'o cchiù brutto d'e male...

Jètteca!

E 'o mése primma m'ô ddicètte!..

Io me ne vaco... 'A state se n'è gghiuta...

Nun tèngo cchiù speranza...

Stu sóle miccio miccio me saluta...

E cómme è frédda 'a stanza!

Io lle dicevo - " Nun avé’ paura!

Che songo sti penziére?...

...........

(Screvènno, chiagno cómme a na criatura

Manco stu fatto fósse stato ajére!)....