Riconuscenza [Italian translation]

Stanòtte 'a dint'o liétto cu nu strillo

aggio miso arrevuóto tutt'a casa,

me so' mmiso a zzumpà cómme a n'arillo...

E nun me faccio ancòra persuaso.

Ma cómme, dico io po', cu' tanta suónne

i' me so' ghiuto a ffà 'o cchiù malamènte;

sti suónne sóngo suónne ca te pònno

fà rummanné stecchito cómme a nniénte.

I' stévo allérta 'ncòppa a na muntagna.

Tutt'a nu tratto sènto 'nu lamiénto...

'O pizzo addò stév'i' èra sulagno...

Dicètte 'ncapo a mme: E' chisto è 'o viénto!

Piglio e mme méngo pe nu canalóne

e véco sott'a n’àlbero piangènte

nu fuósso chino 'e prète a cuppolóne...

e sótto a ttutto stéva nu serpènte.

“Aiuto! Aiuto!” 'O pòvero animale

se mettétte ‘alluccà cu tutt'o ciato!

Appena me vedètte: "Ménu male!...

Salvàtemi! I' mo mòro asfessiato!”.

E chi t'ha cumbinato 'e sta manèra?-

ll'addimannaje mèntr'o libberavo.

-E' stato 'nu signóre aieresséra-

me rispunnètte, e già se repigliava.

-Si nun èra pe vvuje i' ccà murévo.

Facìteve abbraccià, mio salvatóre!-

Me s'arravòglia attuórno e s'astrignéva

ca n'atu ppòco me schiattava 'o còre.

Làssame! - lle dicètte - 'O vvi' ca i' mòro?-

E chianu chiano me mancava 'a fòrza,

'o còre me sbattéva...ll'uócchie 'a fòra,

mèntre 'o serpènte cchiù strignéva 'a mòrza!

-Chisto è 'o ringraziamènto ca me faje?

Chésta è 'a ricunuscènza ca tu puórte?

A chi t'ha fatto bbène chésto faje?

..Ca si' cuntènto quanno 'o vide muórto!-

-Amico mio, serpènte i' sóngo nato!...

...Chi nasce sèrpe è 'nfamo e sènza còre!...

...Perciò t'aggi’a mangià! Ma t'hê scurdato

...ca ll'òmmo, spisso, fa’ chiù pèggio ancòra?!-