8:1 למנצח על הגתית מזמור לדוד
8:2 יהוה אדנינו מה אדיר שמך בכל הארץ אשר תנה הודך על השמים
8:3 מפי עוללים וינקים יסדת עז למען צורריך להשבית אויב ומתנקם
8:4 כי אראה שמיך מעשי אצבעתיך ירח וכוכבים אשר כוננתה
8:5 מה אנוש כי תזכרנו ובן אדם כי תפקדנו
8:6 ותחסרהו מעט מאלהים וכבוד והדר תעטרהו
8:7 תמשילהו במעשי ידיך כל שתה תחת רגליו
8:8 צנה ואלפים כלם וגם בהמות שדי
8:9 צפור שמים ודגי הים עבר ארחות ימים
8:10 יהוה אדנינו מה אדיר שמך בכל הארץ