4:1 למנצח בנגינות מזמור לדוד
4:2 בקראי ענני אלהי צדקי בצר הרחבת לי חנני ושמע תפלתי
4:3 בני איש עד מה כבודי לכלמה תאהבון ריק תבקשו כזב סלה
4:4 ודעו כי הפלה יהוה חסיד לו יהוה ישמע בקראי אליו
4:5 רגזו ואל תחטאו אמרו בלבבכם על משכבכם ודמו סלה
4:6 זבחו זבחי צדק ובטחו אל יהוה
4:7 רבים אמרים מי יראנו טוב נסה עלינו אור פניך יהוה
4:8 נתתה שמחה בלבי מעת דגנם ותירושם רבו
4:9 בשלום יחדו אשכבה ואישן כי אתה יהוה לבדד לבטח תושיבני