Trènt’anne! Ma nisciuno ll’andivina!
E cómme ve fa ardita ‘a primmavèra:
stu frischetto d’abbrile cchiù ve ‘ncéra
e i’ ve tròvo cchiù frésca ògne matina
e cchiù ‘nfucata ve tròvo ògne séra..
E sèmpe allèra, sèmpe accussì allèra,
ca mettite a rrevuóto na cucina:
E accedite redènno na gallina
e mpastate cantanno na pastiéra…
Pasca! E ve tròva lìbbera ‘e penziéro,
frésca cómm’a nu màndurlo fiurito..
Nun tenite nu frato priggiuniéro,
uno ca v’è simpàtico..ferito ;
nun aspettate quacche mala nòva..
Nisciuno ô frónte..e vuje rumpite ll’òva
mpastanno pasta ‘nnanz’a nu tagliéro.
Felicità, felicità! Chi dice
ca nun c’esiste, si ce sta na stélla
p’ognuno ‘nciélo? E vuje site felice!
Site felice pecchè site bella,
pecchè tenite ll’uocchie nire, ‘a vocca
rossa e zucosa comm’a na cerasa…
E pure ‘a guerra, che ‘e paise abbocca
e che porta nu schianto p’ogne casa,
Puro sta guerra passa e nun ve tocca.