Quanno s’è ammaturata ll’uva néra
e primma ‘e scugnà ‘e nnuce,
quanta palómme, â séra
‘ncampagna, dint’a càmmera!
- marrò, paglina, d’oro, bianca e néra –
vèneno e vanno na serata intèra
e fanno ‘o giro-tóndo attuórno â luce.
Ma chésta è luce elèttrica!
Pure ‘ncampagna ce l’hanno purtata!
Oi quanta e quanta nuvità dich’i’!
Na palómma che vò murì abbruciata
manco cchiù a ggènio sujo mo po’ murì!