Owe dirre not lyrics

Owe dirre not,

wie sich hant verwandelot,

dise svmerlichen tage,

von der senelcihen klage,

turet manig herze das in hohem mvote was,

dast aber elliu jar,

daz der winter offenbar,

vns berovbet ane wer,

mit gewalteklichem her,

er benimt vns vil der schonen blvomen vnde gras,

also hat ein wib,

mich berovbet miner sinne,

an den triuwen daz ich si so herzeclichen minne,

wie wart vngenedig ie so minneklicher lip.

Wa nv friunde rat,

sit si niht genaden hat,

wie ich mit disen dingen tvo,

da bedorfte ich rates zvo,

rat ein iegslich friunt als ob diu rede were sin,

scheid ich mich von ir,

vnde ich herze liebe gir,

nach ir steten minnen han,

daz en ist niht gvot getan,

we wem liesse ich danne also den langen dienest min,

ich wil fiurebas,

min geliuke an si veresvochen,

ob diu frowem selde mines heiles welle ruochen,

mir hat aber ein geteling geniuwet disen has.

Der heisset yrenber,

vnde get von botten brvnnen her,

dur sin hiubeschen har abe,

ein vil hiusser dorf knabe,

gvoter wibe minne mvesse im niemer werden teil,

dast ein swunder fluoch,

wan enkvnde es an ein bvoch,

niemer halbes han geschriben,

des er wunders hat getriben,

mit den schonen hiure do die ivngen waren geil,

ob er sich ertobt,

nach ir minnen vnde ir wunnen,

er ist vngewert noh hiubescher da zebottenbrvnnen,

si hat mich vnde in vnde alle vnstete man verlobt.

Breche si den eit,

lisse ir mine sicherheit,

von ir friunden hohe staben,

das ichs iemer wolde haben,

lieb vor allem liebe hin da leip ein ende hat,

moeht es ir gezemen,

das sis also wolte nemen,

als ichs ir geteilet han,

so wer al min lieber wan,

wol vol endet gar nach minem willen nvn enlat,

iener yrenber,

mir niht wol an ir gelingen,

son enwil ich niemer mere wibes lob gesingen,

ob si mir verzihet vnde ir minne ienen wer.

Fiurste Friderich,

vnde wer es betelich,

vmb ein cleines hiufelin,

dar inne min silber voll schrin,

wer behalten den ich habe von diner milten gebe,

des wil ich dich bitten,

dv vernims mit gvoten sitten,

wan ich han in dime goey,

manige snoede svnder droey,

ich wil es gedinen al die wile so ich lebe,

hie mit miner hant,

hin ze got mit miner zvngen,

wirt in frone chore ein lobeliet von dir gesvngen,

da von dv wirst in den paradyse wite erkant.