Osposidda lyrics

Allumadas de fogu,

chimbe carenas fritas:

tintu a ruju an su logu

in oras malaitas.

Ballas graes an rutu

in sas frunzas d’armidda.

Chie bos faghet lutu,

mortos de Osposidda?

A sa tzega sas armas

fiores an brujadu:

sun negadas sas parmas

a su malefadadu.

S’istudat in su puthu

un’ùrtima ischintidda:

chie bos faghet lutu,

mortos de Osposidda?

Sonende bos passizan

finas in s’istradone:

homines assimizan

a peddes de sirbone.

Sa piedade at sutu

rànchida sa mamidda:

chie bos faghet lutu,

mortos de Osposidda?

Ti essit dae su coro

su sàmbene caente:

mancu medaglia ’e oro

t’an dadu, Pitzente.

Sun pranghende a sucutu

pitzinnos e pobidda:

chie bos faghet lutu,

mortos de Osposidda?

Cantu tempus ancora

b’at a cherrer, o frade,

pro ch’ind’essamus fora

dae sa barbaridade?

E no canten su mutu

sas fèminas de 'idda?

Chie bos faghet lutu,

mortos de Osposidda?

Frade!