Oj vócca dóce, oj vócca 'nzuccarata,
cchiù 'nzuccarata assaje de ll’ uva spina,
oj vócca sapurita, oj vócca fina
che ‘a sinfunia d’e vase m’ha mparata.
Vócca cianciósa mia, ca m’hê cantata,
sènza vóce, na mùsica strafina,
vócca zucósa cchiù de 'na curvina
ca tutt’a vita mia m’ hê cunzulata;
vócca ca sape tutta ‘a passióne,
vócca ca sóla me po’ ffà felice,
armuniósa cómm’ a 'na canzóne,
'st’ànema mia ca nun te scòrda maje,
te sònna sèmpe..e dint’ ’o suónno dice :
« I’ tèngo séte ‘e te ! Vasame assaje !!»