Tinirame, tinirame!
Ai thimeljiu di pirifanji,
Că hii soi Alexandrină
Arhundească arădătsină.
Tinirame, tinirame!
Lăi vlâstaru di Armânami,
Spuni tora a ta giunami,
Chirolu nu ari arâvdari.
Poartă hlambura cu hari
Ti a păpănjiloru ihtibari,
Că-i oara Armânamiljiei
Oara Dishtiptariljei!
Nu, nu shedz pi minduiari,
Făr` di tini soia cheari,
Că bati la thimeljiu a ljei
Pătoclu a cheardiriljei.
Analtsă stiznji di vreari,
S-veglji a noastă msheat-aveari,
Mushuteatsă făr-aradă
Hrisusitlu graiu di dadă.
Poartă hlambura cu hari
Ti a păpănjiloru ihtibari,
Că-i oara Armânamiljiei
Oara Dishtiptariljei!
Tinirame, tinirame,
Lăi vlăstaru di Armâname,
Talji funea di fărmatsi
Cari nă curmă a noastă boatsi!
S-ai tu minti dipriună
Că tsi-s vearsă nu s-adună,
Că pădurea a s-hibă dărmi,
Di cărvealji a s-afli sârmi...